Hujjatlar → Muammolar

Keng tarqalgan muammolar

Dastur xato sababini o'zi aytishga harakat qiladi — bu sahifa o'sha xabarlarni kengroq tushuntiradi.

«Kameraga umuman ulanib bo'lmadi»

Kompyuter va NVR bir tarmoqda emasligi eng ehtimoliy sabab. Kompyuterda cmd ochib ping NVR_IP yozing: javob bo'lmasa — kabel/kommutatorni tekshiring. NVR ba'zan internetdan alohida kabelda bo'ladi — kompyuterga ikkinchi tarmoq kartasi yoki NVR'ni umumiy routerga ulash kerak.

«Foydalanuvchi nomi yoki parol noto'g'ri»

NVR menyusidagi login bilan bir xil ekaniga ishonch hosil qiling (katta-kichik harf farq qiladi). Ayrim NVR'lar ko'p noto'g'ri urinishdan keyin vaqtincha bloklaydi — 5–10 daqiqa kutib qayta urinib ko'ring.

«Ulanish bor, lekin bu manzilda oqim yo'q»

Kanal raqami yoki yo'l formati noto'g'ri. «Barcha kameralarni topish» tugmasini bosing — dastur ma'lum formatlarni o'zi sinaydi. Brendingiz sahifasi: Hikvision · Dahua · Uniview.

«Kamera javob berdi, lekin tasvirni ochib bo'lmadi»

Deyarli har doim sabab — H.265 (HEVC) siqish. NVR menyusida shu kanalning substreamini H.264 ga o'zgartiring: Hikvision — Configuration → Video → Sub Stream; Dahua — Camera → Encode → Sub Stream.

«Kamera soati adashgan» (ONVIF kirishda)

ONVIF autentifikatsiyasi kamera soatiga bog'liq. Dastur farqni o'zi moslaydi, lekin juda katta farqda kamera baribir rad etishi mumkin. NVR menyusida vaqtni to'g'rilang yoki NTP yoqing (System → Time).

Qidiruv kamerani topmayapti

Ko'p NVR o'zini tarmoqda e'lon qilmaydi — bu normal. NVR IP manzilini qo'lda kiriting (natija bir xil bo'ladi). Windows o'rnatishda «tarmoq ruxsati» bandi o'chirilgan bo'lsa, qidiruv ishlamaydi — dasturni qayta o'rnatib bandni yoqing.

Telegram'ga xabar kelmayapti

1. Botga kirib /start bosganingizni tekshiring — bot avval siz yozmaguningizcha xabar yubora olmaydi.
2. Panel a'zosi ekaningizni tekshiring (hisob egasidan so'rang).
3. Kunlik hisobot ertasi kuni ertalab 10:00 da keladi; tezkor ogohlantirishlar faqat jiddiy hodisalarda (kamera o'chdi va h.k.) — har hodisada emas.

Hisobot bo'sh yoki kam sanayapti

Kirish chizig'i chizilmagan yoki noto'g'ri joyda. Chiziq eshik ostida, odam oyog'i kesib o'tadigan joyda bo'lishi kerak. Panelda chiziqni qayta chizing — hisob shu zahoti tiklanadi.

«AI xizmati ketma-ket bir necha marta to'xtadi»

Dastur o'zi 1, 5, keyin har 15 daqiqada qayta urinadi — kompyuterni o'chirib yoqish shart emas. Sabab ko'pincha kamerada emas. Qurilma panelida (http://127.0.0.1:8760) «Nima bo'ldi? (jurnal)» tugmasini bosib oxirgi qatorni bizga yuboring. Xabar «AI fayllari topilmadi» desa — dasturni saytdan qayta o'rnating: kamera va chiziq sozlamalari saqlanadi.

Kamera tasviri juda kichik (352×288)

Eski kameralar substreamni atigi 352×288 (CIF) o'lchamda beradi. Sanash ishlaydi, lekin aniqligi pasayadi va ko'pincha hodisa videosi yozilmaydi. NVR menyusida substreamni 640×360 ga ko'taring; menyuda bunday o'lcham bo'lmasa, eng band kamerani (odatda kirish) almashtirish tavsiya etiladi.

Kamerada ikkinchi oqim (substream) yo'q

Ayrim arzon kameralarda faqat bitta, og'ir oqim bo'ladi. Ishlaydi, lekin kompyuterni ko'proq yuklaydi — 4 ta shunday kamera oddiy kompyuterga og'irlik qilishi mumkin. Imkon bo'lsa NVR orqali ulang: NVR o'zi yengil oqim beradi.

Kamera paroli oddiy (123456, admin)

Oddiy parolni tarmoqdagi istalgan qurilma topadi. NVR'da faqat ko'rish huquqli alohida foydalanuvchi oching, uzun parol bering va dasturga shu foydalanuvchini kiriting. Bu foydalanuvchi kamerani faqat ko'ra oladi — sozlamani o'zgartira olmaydi.

Yechim topilmadi?

Bog'laning — kamera modeli va xato matnini yozsangiz, tez javob beramiz.